25 de abril de 2018

Día do Libro: celebración e despedida no club de Lectura

O luns, día 23, despedimos no club de lectura a algunhas das nosas alumnas que deixarán o centro dentro de poucos días. Quixemos agasallalas coa mensaxe que a recoñecida recomendadora de lecturas en Instagram @loenlasnubes propón: #leeydejaleer. Casualmente (ou non tanto; somos un grupiño de lectores militantes) unha das profes levaba a mesma reivindicación na súa bolsa. Así que temos a imaxe ao completo: mozas lectoras ás que lles desexamos unha vida chea de moitísimos libros.  Se o noso club proporciona novas razóns para aumentar o seu afán lector, tarefa cumplida!! Non se pode celebrar mellor o Día do Libro.





A sesión comezou cunha festa na que non podía faltar a tarta resumo do ano de lecturas




Logo tocou falar da derradeira lectura do curso: "Futuro imperfecto", de Xulia Alonso. O Santiago dos oitenta, as drogas, o amor, a morte... moitos temas que permitiron que a tertulia resultase moi fructífera e enriquecedora para todos e todas.




Só queda despedirse ata o ano que ven.

10 de abril de 2018

Liñas paralelas: Contos e música



Hoxe visitaron a nosa biblioteca Pepe Sendón e Marcos Teira coa súa proposta cultural de Liñas Paralelas. Nesta actividade mestúranse a narración oral e a música, creando unha especial atmósfera a luz das candeas.



Os relatos de hoxe tiñan como fío conductor o mundo do traballo e as situacións ás que se enfronta ao longo da súa vida un traballador.

Tivemos ocasión de escoitar relatos de moitos autores, entre eles, Rafael Dieste, Donald Barthelme, Heinrich Böll, Víctor Giudice, Primo Levi e Pippa Goldschmidt.

Como gañar o teu posto de traballo nunha empresa que valora a iniciativa e o dinamismo aínda que non sabes a que se adica? Como responder cando se che esixe facer máis daquilo para o que fuches contratado? Que se sente cando non entendes en que consiste o teu traballo e, por extensión, a túa vida? Como reaccionar cando o teu traballo sae mal a pesar das túas mellores intencións? Como é posible que cantos máis anos pasas no teu posto, máis emperoren as condicións do teu traballo?
É posible sentirse só e alienado rodeado de compañeiros no teu moderno e agradable local de traballo?

Todas estas preguntas encontran unha resposta, ás veces tráxica, ás veces cómica ou sarcástica
nestes casos de ficción que ben poderían ser verdade...

Unha pequena mostra





Pensamos que foi un xeito de compartir unha oportunidade cultural para o alumnado de Ciclos Formativos que cursa o módulo de Formación e Orientación Laboral e en especial para o Ciclo de Prevención de Riscos Profesionais, que estudan os riscos psicosociais no posto de traballo.





9 de abril de 2018

Da a cara por un libro: reto Bookface

Para celebrar o Día do Libro durante todo o mes retámosche a dar a cara por un libro. Participa no Reto Bookface

Haberá sorpresas e sorteo de agasallos entre os partipantes

Xa temos as primeiras participacións. Anímate ti tamén!!


5 de abril de 2018

Contacontos laborais: Pepe Sendón e Marcos Teira visitarán a biblioteca

O vindeiro martes, 10 de abril, teremos a oportunidade de escoitar unha escolma de relatos na voz de Pepe Sendón, acompañado á guitarra de Marcos Teira.



Trátase dunha escolma de contos pensada especialmente para o alumnado da Universidade Laboral de Culleredo que teñen que ver con diferentes aspectos do mundo do traballo.
Son relatos de diferentes épocas, estilos e culturas, mostrando así os moitos modos en que a literatura se aproxima á experiencia do ser humano alí onde pasa as máis das horas do seu día: no seu posto laboral. Escritos polos autores: Rafael Dieste, Donald Barthelme, Heinrich Böll, Víctor Giudice, Primo Levi e Pippa Goldschmidt.

2 de abril de 2018

Reunión do Club de Lectura

Antes das vacacións de Semana Santa o Club de Lectura reuniuse de novo. Para facer máis levadeiros os exames a lectura escollida foi "El Proyecto Esposa", de Simsion Graeme. Con moito humor a obra acércanos á personalidade do protagonista, Don Tillman, que padece síndrome de Asperger.


A tertulia permitiu falar de outros síndromes do espectro autista e trouxo á mesa outras obras con protagonistas singulares