8M na Biblioteca

 Mans a obra para conmemorar o 8M!

O alumnado do Ciclo Superior de Prevención de Riscos Profesionais confeccionou as súas propias chapas, deseñadas por eles mesmos para participar no concurso organizado pola empresa Resonac con motivo da Resonac Women's Week. Os gañadores foron María e Brais, que foron agasallados cun suadoiro co seu deseño e uns libros para  engrosar os andeis de fondos de igualdade da nosa biblioteca.

 

Pero para nós, todas merecían un premio e ser lucidas nas nosas solapas.

Tamén enchemos a biblio co logo da actividade organizada este ano, Mulleres Raices, a nosa homenaxe ás que viñeron abrindo camiño. 

Completamos a mañá recoñecendo o papel de moitas mulleres referentes en distintos ámbitos.

 

 

 Por suposto, Rosalía luce tamén fachendosa a chapa conmemorativa. Faltaría máis!

Mulleres Raíz, a nosa homenaxe polo 8M

 Mulleres Raíz e a nosa homenaxe as que viñeron diante para conmemorar o 8M.

As avoas son memoria viva e forza silenciosa. Coas súas mans tecen historias, coidan, ensinan e sosteñen familias enteiras. Son exemplo de resistencia, sabedoría e amor incondicional. En "Mulleres Raíz" celebramos os seu legado, porque grazas a elas medran e florecen as novas xeracións.

 

 

 

Mulleres Colleiteiras, un exemplo real para o 8M

 Hoxe, da man de Susana Pérez Crespo e Taller de Solidaridad, tivemos ocasión de compartir unha charla con Sofía Vázquez Manzano, unha das cooperativistas de Mulleres Colleiteiras.

 Coñecimos a historia de Sofía grazas a exposición que engalanou a entrada ao centro fai uns meses.  Agora escoitamos en directo a forza da súa voz e a súa traxectoria vital: muller, xitana, vulnerable, cunha vida chea de dificultades, que encontrou no emprendemento o camiño para unha vida mellor.

 O seu proxecto empresarial, Mulleres Colleiteiras, consiste en recoller aceite usado para a súa reciclaxe e aproveitamento posterior para outros usos. 

Nunha hora Sofía puxo en valor a educación, a igualdade, a non discriminación, o respeto ao medio ambiente, cun discurso que deixou unha fonda pegada entre todos os que tivemos a sorte de escoitala.

Canto valor pode haber detrás dun obxecto tan simple como os funiles con que nos agasallou! 

 

O mellor xeito de visibilizar o 8M é con exemplos de vida como o de Sofía. Grazas por ser un referente!
 

O Club de Lectura viaxa xunto "Os Caravanistas"

 Este mes quixemos cambiar de rexistro, deixar o drama e pasarnos a unha obra máis humorística, aínda que non exenta de crítica social, Os Caravanistas, de Elizabeth von Arnim. A obra pon en boca do protagonista todos os estereotipos de xénero e descubrimos como as mulleres foron conquistando unha nova posición, máis xusta. 

 

A nosa mesa, chea de títulos como "Os homes explícanme cousas", de Rebecca Solnit e outras lecturas sobre feminismo e igualdade.
 

A sobremesa, ambientada no Entroido.

Día contra da LGTBIFOBIA no deporte

Cartel feito a partir dos materiais elaborados pola Rede Educativa de Apoio LGTBIQ+ de Galicia.

Aproveitamos para facer unha selección de fondos relacionados e de interese para todo o noso alumnado, particulamente o da familia de Activides Físicas e Deportivas.

 

Talentos Inclusivos de novo na biblioteca

 O alumnado de Electricidade e de Instalacións eléctricas de FP Básica participa un ano máis no programa Talentos  Inclusivos en asociación coa entidade Aspace.

Una experiencia que permite ao alumnado coñecer as dificultades no día a día das persoas con parálise cerebral e descubrir como eles poden axudarlles.

Dinamización da Exposición de Enredadas no Cambio

 Aproveitamos a exposición sobre emprendemento feminino para traballar os valores de igualdade e o fomento do espíritu emprendedor co alumnado. 

Os alumnos e alumnas descubriron as historias de cada unha das protagonistas da exposición e valoraron o seu emprendemento como un éxito para elas, as súas familias e as súas comunidades. 

 Queda pendente para vindeiras sesións a visita de Sofía, unha das Mulleres Colleiteiras cuxa historia forma parte da exposición.

25N: o machismo mata. Non cales.

 

Emprender, unha oportunidade. 25N

 No 25N enchemos o noso hall de historias positivas, de proxectos de emprendemento feminino, que permiten ás súas protagonistas saír de situacións de violencia ou vulnerabilidade económica, para reivindicarse como persoas libres e autónomas, para levar adiante os seus proxectos vitais, axudando ao mesmo tempo as súas comunidades. O emprendemento pode ser ferramenta de cambio, dando oportunidades para ser libres.

Queremos agradecer a colaboración de Taller de Solidaridad dentro do seu proxecto Enredadas polo Cambio, por cedernos a exposición e programar o obradoiro de dinamización da mesma para o noso alumnado.