Rosalía na nosa Rula (Radio na Biblio)

 Comezamos a preparar a homenaxe a Rosalía gravando poemas desde a Radio, grazas a coordinación de EDLG.

Os nomes íntimos, de Lucía Aldao e Samuel Merino

 Seguimos celebrando a semana das Bibliotecas, hoxe da man de Lucía Aldao e Samuel Merino co seu recital poético musical "Os nomes íntimos". 

 

O alumnado do Ciclo de Desenvolvemento de Proxectos de Instalacións Térmicas e de Fluídos e do Ciclo de Prevención de Riscos Laborais tiveron a oportunidade de participar dun espectáculo poético cuidado, fresco e honesto. A cultura e a verdade por bandeira poética.

Grazas por construír na biblioteca durante unha hora un lugar seguro, de confianza, un lugar onde recoñecernos (no que fomos e no que somos) e aprender a compartilo. Non hai mellor definición do que debe ser hoxe unha biblioteca. 

Semana das Bibliotecas: Os nomes íntimos, de Lucía Aldao e Samuel Merino.

 Como un día parécenos pouco, teremos toda unha semana de celebración. O evento estrela da semana será gozar do recital poético-musical de Lucía Aldao e Samuel Merino. A proposta mestura a palabra, a poesía, a música e a interacción co público por medio de propostas lúdicas.

Tecido coa infinita capacidade da poesía en lingua galega para aguzar o sentido crítico e ofrecer unha ollada artística e poliédrica sobre asuntos como a igualdade, a diversidade sexual, a construción da identidade ou a saúde (mental, pero non só) este recital musicado xorde da necesidade de celebrármonos na nosa individualidade, pero tamén da de sabernos parte dun todo (colectivo, comunidade, sociedade, panda de amigas) no que atopar referencias e referentes desde e coas que ir conformando esa persoa que somos ou estamos a piques de ser e coa que conviviremos o resto das nosas vidas. Esa persoa que leva tantos nomes aos que atendemos cando nos chaman.

Día da Poesía

 

A poesía enche as mesas e andeis da biblioteca!

 

Poesía, unha descuberta de emocións

 Hoxe tivemos a sorte de recibir a Dores Tembrás no noso Club de Lectura. Pedímoslle que nos fixera un obradoiro de aproximación á poesía, un xénero que para a maoiría dos asistentes é alleo nas súas lecturas.

 

Descubrimos que a poesía é ritmo, é beleza, é emoción. Imposible non quedar conquistadas polos versos recitados con tanta verdade na voz de Dores.

 

Se a función dun club de lectura é compartir experiencias e sentimentos arredor dunha obra literaria, hoxe acadamos o obxectivo cando quedamos en silencio colectivo ao recibir o impacto dos versos escoitados. 

 Imposible non declararse amante da poesía cando na túa primeira chegada ao xénero abreche a porta unha militante convencida, que chega cargada con balas do calibre de Edna St. Vincent Millay, Pilar Adón e Sharon Olds, entre outras.

Outro día marabilloso para gardar na memoria do noso Club.

Celebrando o Día do Libro con Popesía.

 O alumnado de 1º curso do Ciclo Superior de Acondicionamento Físico participou na actividade Popesía, un concerto didáctico que mestura poesía galega e música pop actual. Pareceunos unha actividade moi apropiada para este grupo que ten varios módulos relacionados coa música e a comunicación.

Día da poesía

Este ano celebramos o Día da poesía cun concurso de videopoemas que tivo moito éxito, nel premiamos diferentes aspectos como a orixinalidade ou a declamación poética. Puxemos un exemplo de Lucía Nodar, a profesora de inglés con poemas de creación propia en castelán e en inglés, ¡Grazas Lucía pola túa preciosa aportación!

Deixamos a continuación os vídeos para que poidades desfrutar deles. 

Terceiro premio á orixinalidade:

 

Segundo premio á mellor declamación:

Primeiro premio á mellor calidade artística:

Aproveitamos ademais o Día da poesía para celebrar a segunda sesión do Club de lectura, esta vez tocou Soldados de Salamina de Javier Cercas, cambiamos opinións, impresións e voltamos á Guerra Civil española, unha época chea de odios, rencores, pero tamén de heroes e esperanzas.

Aldaolado sembran versos e sonrisos na biblioteca

Hoxe na biblioteca celebramos por todo o alto o Día do Libro, e fixémolo ao grande coa visita de Lucía Aldao e María Lado.

Xa que este ano a temática proposta para as bibliotecas escolares é Poéticas Diversas pensamos en darlle unha volta ao concepto de poesía, en romper prexuízos e promover un recital poético non ao uso, no que impera a risa, a improvisación e a complicidade.

Alumnado de 1º de BAC e do Ciclo Superior de Mantemento de Instalacións Térmicas e Fluídos, xunto con moitos representantes do profesorado, gozamos da oportunidade de compartir os versos e o humor de Aldaolado.

Primeiro, tocaron as presentacións...


 Uns versos para comezar...


Sempre hai tempo para reivindicar o idioma e practicar sobre o uso do pronome átono, coa axuda das cancións de Rocío Jurado.




Pero tamén tivemos que facer de poetas improvisados


O resultado encantounos, quedounos un poema magnífico, único e inesquecible.

Versos, música e humor para celebrar o Día do Libro

O departamento de Lingua Castelá e a Biblioteca organizamos conxuntamente unha actividade relacionando o Día do Libro coa temática deste ano das Bibliotecas Escolares (Poéticas Diversas). O venres o alumnado de 1º de Bacharelato asistirá na biblioteca ao espectáculo de Lucía Aldao e María Lado, combinando versos, música e humor. Será ás 11:15 na biblioteca. O aforo de alumnado está completo pero o profesorado que teñades dispoñibilidade horaria quedades convidados, aínda que quededes de pé.

Podedes ver un adianto do traballo de AldaoLado  aquí.

Hoxe, Día do Libro e dos dereitos de autor, aproveitamos para compartir o díptico para conmemorar este día elaborado pola Asesoría de Bibliotecas Escolares.  Marilar Aleixandre xenerosamente cedeu un poema para esta pequena peza de difusión do Día do Libro, sobre a lectura como unha viaxe ao fondo das preguntas. Un texto que convida  a reflexionar sobre a importancia da lectura como revulsivo para interrogar, cuestionar, dubidar, aprender, enfocar, repensar e nunca conformarse.

Semana da Saúde: Poemas que curan

Estamos a celebrar a Semana da Saúde. Hoxe houbo unha feira no hall e a biblioteca non quixo faltar cos nosos Poemas que curan. Que maravilla repartir versos e recibir sonrisos!

I Semana da Saúde

A vindeira semana será intensa no centro: celebramos a I Semana da Saúde. Están previstas exposicións, debates, charlas, experiencias...

Aquí tedes o calendario

Para abrir boca (esperando que chegue a hora do almorzo saudable) xa temos unha exposición no hall da cafetería sobre plantas invasoras, grazas a ADEGA.

O prato forte será o luns día 8, cando moitos departamentos do centro xunto co alumnado montaremos unha Feira da Saúde no hall principal. Atoparemos no seu posto ao alumnado nas mesas de Bioloxía, Química, Electricidade, Educación Física, FOL...

Tratándose da saúde non poden faltar tampouco as mesas informativas organizadas polo alumnado do Ciclo de Prevención de Riscos Laborais que nos dará todo tipo de pautas para mellorar o noso estado xeral de benestar.

E por suposto, alí estará tamén a biblioteca, cunha selección de fondos que tratan a medicina, a enfermidade, a saúde sexual...

Unha pequena escolma do que atoparedes

Pero non nos conformamos cunha exposición. Queremos curalo todo! E que mellor que a poesía para remediar todos os males: non hai mal de amores, machismo, guerra ou tristeza que se resista ao poder dos versos.

Temos unha botica chea de poemas que curan

E un frasco de pílulas motivadoras

Moito por contar!