Día de Rosalía y Club de Lectura

Onte celebramos o Día de Rosalía rodeados de flores e libros pois tivemos a nosa primeira sesión do Club de Lectura. Este ano O Club morreu na súa forma debido á situación Covid, mais non na súa esencia. A metade de curso decidimos seguir con esta andaina e retomar esta actividade tan fermosa  para seguir a compartir intres para lembrar.

Nesta sesión intercambiamos opinións sobre Mejor la ausencia de Edurne Portela, unha novela chea de conflitos sociais que nos fixo volver a unha época na que España estaba ameazada polo terrorismo de ETA e a heroína dominaba as rúas. A violencia é o centro da obra e o mundo que rodea a Amaia.

Tivemos tamén unha visita moi especial, contamos con Eugenia a quen lle regalamos un libro e unha rosa para conmemorar o Día de Rosalía. Grazas, Eugenia, por compartir con nós este día.

Día da nena e da muller na ciencia

Hoxe celebramos o Día da nena e da muller na ciencia dunha maneira moi especial. Tivemos a visita de Ros López, exvoluntaria da ONG Mundo Cooperante que viaxou por varios países axudando a mulleres e nenas en situación de exclusión social. 

Esta actividade está enmarcada no Proxecto de Igualdade que se leva a cabo nos cursos de FP básica e trata de concienciar ao alumnado sobre as desigualdades de xénero que todavía se viven na nosa sociedade. Nunhas sesións previas falamos da evolución da situación da muller na sociedade (na familia, no traballo, na ciencia...) e hoxe reflexionamos sobre a situación todavía máis desfavorecida que sofre a muller noutros países. O punto final foron dúas dinámicas que tiveron ao alumnado moi participativo,  viviron nas súas carnes a explotación e a denigración social. As súas conclusións foron emotivas: a muller non vale nada en moitos países, non teñen dereitos, non poden estudar,  moitas nenas están destinadas á prostitución... Deixamos unha pequena mostra da actividade.

O Día da nena e a muller na ciencia tamén o celebramos cunha pequena exposición con parte dos nosos fondos da "Biblioteca de igualdade", en concreto aqueles que fan referencia á muller e a ciencia. Esperemos que poidades "degustar" algún exemplar.

Pon o teu lugar no mapa

Desde a biblioteca e xunto co equipo de Dinamización da Lingua Galega  iniciamos esta semana a recollida e a fase de exposición do proxecto "Pon o teu Lugar no Mapa". A recollida de palabras do galego local iniciouse o curso pasado, e contou coa implicación dos grupos de 1º de Bacharelato.

Nesta nova fase queremos animar a toda a comunidade educativa a recoller palabras galegas orixinais e propias dun lugar, vila ou cidade. Esperamos que o mapa do recibidor fomente a participación pois aportar unha palabra significará destacar nel ese lugar polo que sentimos algo especial.

Escape room sobre os xéneros literarios

O alumnado de FP Básica traballou os xéneros literarios a través do escape room "O regreso dos zombis" facendo un recorrido pola nosa biblioteca. Os enigmas foron moi variados e permitiulles navegar entre os cómics, consultar El Quijote de la Mancha e rebuscar entre as nosas películas.  

Tiñan que ir protexidos porque os zombis podían atacar en calquera momento e Federico os agardaba na entrada...

A pesar disto, conseguiron a chave para escapar da habitación resolvendo todos os enigmas e ao final o equipo máis rápido tivo a súa recompensa!!

Nadal Solidario e Boas festas

 Grazas a toda a comunidade educativa da Laboral este Nadal será mellor para moitas familias. O calendario solidario foi unha actividade moi gratificante e desde a biblioteca queremos agradecer a vosa xenerosidade e colaboración, tamén queremos dar as grazas ao centro por ter contribuído cunha importante doazón destinada a produtos de hixiene, limpeza e alimentos. Aquí está o resultado da recadación destes 11 días a favor do banco de alimentos Rías altas. Grazas de novo.

Bo Nadal!!

Recomendacións literarias para o Nadal

  Desde a biblioteca queremos intentar fomentar a lectura entre todo o persoal do centro e sobre todo entre o noso alumnado e motivalo para que leven algúns libros de lectura este Nadal. Para iso por cada préstamo que se faga desde a biblioteca agasallamos cun marcapáxinas e uns doces de Nadal a todos os usuarios.

Adxuntamos algunhas das nosas recomendacións para amenizar estas datas e aproveitamos esta mensaxe para desexarvos a todos que pasedes unhas boas festas.