A voltas de novo cos andeis

 Será esta a definitiva colocación? Volvemos a colocalo todo para adaptar o espazo á nova distribución.

O andamio leva tanto tempo entre nós que xa nos provoca colocarlle algúns libros :)

Alumnado colaborador: materiais auxiliares para os nosos andeis

 De novo temos que agradecer ao noso alumnado a súa colaboración por deseñar e elaborar elementos de retención dos libros nos andeis.

Están moi chulos!

Novo cambio de andeis na biblioteca...e van...

 Outra vez toca mudar os andeis da biblioteca, coa esperanza de que sexa a definitiva. Seguimos en situación provisional, tratando de acomodarnos ao novo espazo asignado. Desta volta, ampliamos moitos metros, que queremos encher de actividades e recursos.

Moito traballo que esperamos logre que a comunidade educativa teña novos recursos ao seu alcance. Na nosa mente temos ideado un espazo de radio, un espazo maker, un espazo de traballo colaborativo... Esperemos que sexan pronto unha realidade.

Toca expurgar!

 

Coa conversión en CIFP todo o centro ten que adaptarse ao novo perfil do alumnado. A biblioteca tamén tratará de que os seus fondos sexan útiles á comunidade educativa, descartando aqueles que xa non responden ao interese dos nosos usuarios.

A nosa colección está en continua renovación, xa que pretendemos unha biblioteca dinámica, conectada as necesidades cambiantes de alumnado e profesorado. Non vale parar!

Melloramos a sinalización de idiomas nos fondos

Para facilitar a localización de fondos escritos en lingua orixinal, decidimos identificar os textos que posuímos en lingua francesa, inglesa e portuguesa. Optamos por situar unha bandeira do idioma de orixe do texto.

Esperamos que sexa de utilidade para os nosos usuarios!

Nova biblioteca de xénero e igualdade

Queremos visibilizar a igualdade nos nosos andeis e por iso creamos una sección nova, onde incluiremos a temática de xénero e igualdade. Nestes estantes atoparás fondos de ficción e non ficción que falan de muller, de feminismo, de temática LGTB. Cambiamos a etiqueta destes fondos ao color violeta para podelos identificar facilmente.

Unha nova cartelería preside o andel, que pensamos encher rapidamente. Celebramos así o Día da Muller con libros, como nos gusta.

Dandolle unha volta aos nosos andeis

Hoxe pasamos o día carretando enciclopedias e outros fondos para o depósito coa finalidade de deixar sitio nos andeis a outras obras máis solicitadas. 

Sentimos unha mestura de pena polo desterro de fondos que foron imprescindibles noutro tempo non tan afastado e a emoción da estrea dos novos andeis.