Xa temos un propósito para o Aninovo: o noso compromiso solidario

 Que mellor que esperar o Aninovo con novas metas que alcanzar e novos compromisos que levar adiante.

O resultado da enquisa realizada co gallo do GivingTuesday foi o seguinte:

Así que cando o tempo acompañe escolleremos o espazo onde realizaremos a limpeza de plásticos e outros residuos.

Benvido 2022! Moito por facer!

GivingTuesday, un compromiso colectivo

 

Despois da avalancha consumista do Black Friday e o Cyber  Monday, desde a biblioteca do centro propoñémos, coma cada ano, celebrar o GivingTuesday, un día para ser solidario, para dar e non para mercar cousas (as máis das veces, inútiles).

Para que sexa realmente un compromiso colectivo decidimos crear unha enquisa para que sexa a comunidade educativa a que escolla a acción a desenvolver. 

Compartimos tamén aquí o formulario.

Giving Tuesday: colabora na nosa árbore solidaria

 Por fin pasou o ruido do Black Friday e do Cyber Monday e xa podemos dedicar o tempo ás cousas que importan. Este ano para celebrar o Giving Tuesday poñemos en marcha unha iniciativa solidaria co Banco de Alimentos Rías Altas.

Desde a Biblioteca do centro imos facer un "Calendario solidario" cuxa recaudación irá destinada ao banco de alimentos "Rías altas". A donación poderá efectuarse de dúas maneiras, poderase colaborar con alimentos ou ben con diñeiro.  A idea é que durante o mes de decembro estará exposta na entrada do instituto unha árbore con caixas,  cada día donaremos un tipo de alimento (por exempo, o día 1 café, o día 2 arroz...), ao día seguinte farase pública a cantidade de alimentos recaudados en función das donacións.

O sistema será o seguinte:

-para donar os alimentos haberá un depósito ao lado da árbore e poderase facer ao longo do día dentro do horario do centro.

-para donar diñeiro haberá que facelo na biblioteca dentro do seu horario ( de luns a xoves de 08:30 - 12:30 e venres de 08:30 - 12:10). Alí haberá unha hucha custodiada polo profesor de garda. Todo o que done cartos recibirá un boleto que se depositará nun recipiente ao lado da árbore e entrará nun sorteo semanal. Tendo en conta que hai alumnos e profesores que só teñen clase de tarde fixaranse dous días á semana nun horario determinado para facilitar as donacións (martes de 16:00 a 16:30 e xoves de 18:00 a 18:30). 

Os cartos recaudados serán destinados a alimentos que se levarán a "Rías altas" e será o persoal da biblioteca o encargado de mercalos e de poñelos xunto á arbore, toda a recaudación farase pública nas redes sociais para asegurar a transparencia da iniciativa.

 Este ano máis que nunca os bancos de alimentos necesitan da nosa axuda e nós coma centro educativo intentaremos pór o noso grao de area.

Giving Tuesday: voluntariado na biblioteca

Voltamos coa nosa campaña contra o consumo masivo polo Black Friday e o Cyber Monday. Cada día consideramos máis necesaria a educación nos valores de consumo responsable.

Coma cada ano a nosa oferta de consumo pasa polas novelas negras nas que volan as páxinas pero non os cartos.

Pareceunos que a data de hoxe era especialmente acaída para que os nosos voluntarios da biblioteca asinarán os seus compromisos. No Giving Tuesday pensamos en dar non en mercar!

Ponte no seu lugar: Discapacidade e inclusión

O día 3 de decembro e o día internacional das persoas con discapacidade. Baixo o lema "Ponte no meu lugar" deseñamos unha chea de actividades para celebrar este día na biblioteca.

Inauguramos a actividade "Bibliotecas humanas", onde unha persoa ven relatar a súa experiencia de vida. Hoxe convidamos a Jesús Suárez, discapacitado visual. Jesús contounos como aos vinte anos diagnosticáronlle o seu problema de visión e como tivo que asumir a súa nova situación e reinventarse saíndo da súa zona de confort. A día de hoxe traballa, ten un grupo de rock, practica atletismo e exerce como voluntario. Un exemplo para calquera dos que non temos aparentemente ningunha discapacidade recoñecida, pero temos dificultades para afrontar os pequenos obstáculos cotiás.

Tocaba poñerse no lugar de Jesús. O alumnado que escoitaba a súa charla cursan o Ciclo de Animación Deportiva e precisamente teñen un módulo de atención a discapacitados. Así que houbo pronto voluntarios para poñerse na súa pel.







Os alumnos e alumnas que participaron na charla organizaron a continuación unha actividade no vestíbulo principal para experimentar en primeira persoa a falta de movilidade ou a falta de visión.

Unha xornada para defender a inclusión e unha nova oportunidade para traballar a Axenda 2030 e o obxectivo 10

Operacion Pangono Pangono alumea Malawi e a biblioteca

Moito agradecemos aos compañeiros de Operación Pangono Pangono, Ricardo, Jesús e Fernando que viñeran hoxe a compartir a súa experiencia en Malawi con nós.

Eles están a desenvolver o proxecto #AlumeaMalawi, para garantir o suministro de luz eléctrica en Chezi. Para iso están instalando paneis fotovoltaicos que permiten o funcionamento sen interrupcións das bombas de auga no orfanato.

 Foi unha oportunidade para reflexionar sobre as cousas que verdadeiramente importan, lonxe de compras absurdas e descontroladas promovidas por intereses comerciais de grandes multinacionais. Desde a biblioteca reivindicamos o #GivingTuesday e as pequeñas accións que poden cambiar o mundo. Todo depende de nós e do noso compromiso coma sociedade.

Nin #BlackFriday nin #CyberMonday, apúntate ao #GivingTuesday

O vindeiro martes 27 celebrarase o #GivingTuesday (martes para dar e compartir). O movemento #GivingTuesday nace como alternativa aos días previos de BlackFriday e CyberMonday, que promoven as compras previas do Nadal.

A biblioteca da Laboral queremos unirnos ao movemento solidario organizando dúas charlas onde os compañeiros do centro da Operación Pangono Pangono van a expoñer ao profesorado e alumnado asistente a súa experiencia de voluntariado en África.

No primeiro recreo do martes 27, a partir das 10:15 h, Fernando Vidal, Jesús Fernandez e Ricardo Baamonde presentarán ao profesorado e persoal do centro o proxecto da Operación Pangono para este nadal, que os levará de volta a Malawi para a realización de cinco instalacións fotovoltaicas en hospitais, residencias de estudantes e orfanatos deste pequeno país africano.

Posteriormente, ás 10:30 h, haberá unha segunda charla dirixida a grupos de alumnado, co obxectivo de promover a realización de accións de voluntariado. 

Animámosvos a todos e todas a participar.