Libros que alimentan: Mercado solidario

 Deixamos unha mostra de imaxes do noso mercado solidario. Estamos moi satisfeitas do resultado xa que acadamos unha recaudación de 741,65€ que irán íntegramente destinados ao Banco de Alimentos Rías Altas.

 

Libros sen volta: novo expurgo

 Coa nova remodelación da biblioteca descartamos moitas das enciclopedias e outras obras que estaban no antigo almacén. Son exemplares que non teñen sentido xa na nosa biblioteca, e con certa pena hai que recoñecer que case en ningunha. 

Por  iso decidimos darlles unha derradeira oportunidade e ofrecer estes exemplares a comunidade educativa, para levar sen volta.

Mudámonos! Visita o novo espazo

 

Como sabedes por mor das obras no centro tivemos que trasladar a biblioteca a un novo espazo. Estamos preparando todo para que podamos atopar un lugar de encontro agradable e práctico para toda a comunidade educativa.

Mercadillo solidario cos fondos expurgados

 O expurgo da antiga biblioteca pasa primeiro pola entrada do centro, para dar a moitos libros unha segunda oportunidade. Moitas das obras están envellecidas e deterioradas, outras non teñen sentido entre os fondos da nova biblioteca pero de calquera xeito da moitísima mágoa tirar con todo sen darlle unha nova oportunidade. Hai un lote de curiosidades, todas desfasadas, claro, pero que ao mellor atopan oco nas bibliotecas particulares dos membros da comunidade educativa.

Estamos deixando algúns lotes na entrada do centro para que se collan libremente, aínda que se agradece un donativo (en metálico, en leite, en alimentos).

A idea inicial era expurgar todo pero a verdade é que a tarefa produce sentimentos encontrados e provoca reflexións.

Se polo menos algún dos exemplares pode ter unha segunda vida ou axudar a outros a sobrelevar a súa xa é bastante.

Comeza o gran expurgo da antiga biblioteca

 Estamos facendo un gran esforzo para seleccionar entre os volumes da antiga biblioteca aqueles que xa remataron os seus servizos e que van a ser expurgados con carácter definitivo. Ás veces costa traballo recoñecer que aquelas enciclopedias que un día foron o non vai máis do saber xa non teñen sentido para os nosos usuarios. Outros tempos son chegados!

Toca expurgar!

 

Coa conversión en CIFP todo o centro ten que adaptarse ao novo perfil do alumnado. A biblioteca tamén tratará de que os seus fondos sexan útiles á comunidade educativa, descartando aqueles que xa non responden ao interese dos nosos usuarios.

A nosa colección está en continua renovación, xa que pretendemos unha biblioteca dinámica, conectada as necesidades cambiantes de alumnado e profesorado. Non vale parar!

Dandolle unha volta aos nosos andeis

Hoxe pasamos o día carretando enciclopedias e outros fondos para o depósito coa finalidade de deixar sitio nos andeis a outras obras máis solicitadas. 

Sentimos unha mestura de pena polo desterro de fondos que foron imprescindibles noutro tempo non tan afastado e a emoción da estrea dos novos andeis.