A biblioteca comprometida coa seguridade laboral

 Na Laboral estamos a celebrar o Día da Seguridade e Saúde no Traballo con postos informativos e actividades organizadas polo alumnado de 1º do CS de Prevención de Riscos Laborais.

Un dos postos informativos estivo situado na propia biblioteca e nós felices de non perder ocasión de formar parte da vida do centro, das preocupacións do alumnado e de ser acubillo para todas as actividades propostas polo profesorado.

Semana da prensa e mesa redonda

Hoxe tratamos de unir dúas conmemoracións moi importantes nunha mesma actividade, tivemos na nosa biblioteca unha mesa redonda sobre o sexismo no deporte para seguir a celebrar o Día da muller e a Semana da prensa. Contamos coa participación de varios alumnos e alumnas do centro que destacan en varios deportes como judo, fútbol ou softball e o noso auditorio foi o alumnado do segundo curso do ciclo de Actividades físicas e deportivas.

Contamos ademais con dúas mulleres destacables no mundo do deporte, Vane Alonso, campioa de España e do mundo de pádel, e Teresa Martínez, primeira muller árbitro internacional de hockey no mundo. Estas dúas deportistas nos falaron da súa experiencia e nos contaron diversas situacións polas que tiveron que pasar na súa carrreira deportiva só polo feito de ser muller. Compartimos todos a nosas experiencias e chegamos a unha conclusión unánime: queda moito por facer no eido da igualdade.

Os recursos da Laboral ao servizo da sociedade durante a crise do Coronavirus

Decidimos que os recursos da Laboral debían ser útiles á sociedade nestes días tan complicados, sobre todo para o persoal sanitario tan necesitado de equipos de protección frente ao Coronavirus.

Así que puxemos a funcionar as impresoras 3D e estamos a fabricar máscaras de protección facial e protectores para mascarillas, que están sendo entregados ao persoal sanitario de distintos centros de saúde de Culleredo e A Coruña.

Rompendo estereotipos no deporte

O venres contamos coa presenza na biblioteca de deportistas (homes e mulleres) de distintas disciplinas. Algúns deles son alumnas e alumnos da Laboral; outras son deportistas de elite, campioas a nivel nacional.

Tivemos representación do mundo do boxeo, rugby, remo, fútbol, conducción de cars, judo. Como auditorio contamos co alumnado e profesorado do Ciclo de Animación Deportiva e correspondeu moderar o debate a unha alumna de Bacharelato, apoiada pola profesora de Lingua Castelá.

Tiñamos moitas ganas de escoitar diferentes puntos de vista e a biblioteca lucía preparada para acoller o acto.

A actividade inaugurou a Semana da Saúde que se celebrará no centro con exposicións, charlas, almorzos saudables e moito máis que temos preparado.

Cando falamos de saúde temos que ter presente a definición da OMS que indica que saúde é un estado de completo benestar físico, psíquico e social. Por tanto, as sociedades con actitudes machistas están enfermas e non son sas.

Para iniciar o debate visualizamos o bochornoso momento da entrega do Balón de Ouro a Ada Hegerberg



Seguimos cunha parodia de José Mota, entrevistando a Garbiñe Muguruza, aínda que lamentablemente concorda bastante coa realidade do tratamento dos medios de comunicación ao deporte feminino

Todas as participantes consideraron que aínda que no seu grupo deportivo non viviran situacións de discriminación cos seus compañeiros varóns, desde as propias gradas, as arbitraxes, as federacións, os medios de comunicación  si se manteñen condutas e actitudes claramente sexistas.







Resultaron moi interesantes todas as experiencias compartidas.

Aproveitando a presenza de deportistas de alto rendimento, quixemos centrar o debate nun aspecto, ás veces esquecido ou invisibilizado: Que pasa tras a retirada do deporte de elite? Como é á volta a realidade fóra da competición?


Ter claro que é moi difícil vivir do deporte por un longo periodo de tempo, formarse, estudar, acadar un emprego, tratar de compatibilizar vida persoal e deportiva parecen ás solucións.

En definitiva, o tempo previsto, hora e media,  non chegou a nada. Queda moito por visibilizar e debater. A biblioteca queda aberta para continuar falando, pensando e reflexionando.

I Semana da Saúde

A vindeira semana será intensa no centro: celebramos a I Semana da Saúde. Están previstas exposicións, debates, charlas, experiencias...

Aquí tedes o calendario

Para abrir boca (esperando que chegue a hora do almorzo saudable) xa temos unha exposición no hall da cafetería sobre plantas invasoras, grazas a ADEGA.

O prato forte será o luns día 8, cando moitos departamentos do centro xunto co alumnado montaremos unha Feira da Saúde no hall principal. Atoparemos no seu posto ao alumnado nas mesas de Bioloxía, Química, Electricidade, Educación Física, FOL...

Tratándose da saúde non poden faltar tampouco as mesas informativas organizadas polo alumnado do Ciclo de Prevención de Riscos Laborais que nos dará todo tipo de pautas para mellorar o noso estado xeral de benestar.

E por suposto, alí estará tamén a biblioteca, cunha selección de fondos que tratan a medicina, a enfermidade, a saúde sexual...

Unha pequena escolma do que atoparedes

Pero non nos conformamos cunha exposición. Queremos curalo todo! E que mellor que a poesía para remediar todos os males: non hai mal de amores, machismo, guerra ou tristeza que se resista ao poder dos versos.

Temos unha botica chea de poemas que curan

E un frasco de pílulas motivadoras

Moito por contar!