A Fotografía: toda unha arte

Hoxe tivemos ocasión de coñecer moitas cousas sobre a luz e a fotografía, grazas á exposición de Adrián Iglesias, alumno de 2º do CS de Mantemento de Instalacións Térmicas. Adrián forma parte de unha asociación recén creada, Foto Acción Coruña, que gustan de fotografiar a noite, as estrelas, facer lightpainting...

Entre os asistentes moitos dos alumnos dos Ciclos de Marítimo-Pesqueira, xa que, ademáis de ter estudado no Ciclo o módulo de Astronomía, van ter ocasión de gozar durante a súa vida profesional de ceos cheos de estrelas, alonxados de todo foco de contaminación lumínica.

Logo de aprender un lote sobre o mellor momento para capturar o ceo azul da noite, facer fotografías circumpolares das estrelas... quedamos abraiados coa beleza das imaxes captadas coa súa cámara. Aínda máis cando nos explicou que as súas fotografías non tiñan tratamento dixital e que eran só resultado da paciencia para manter o tempo de exposición.

Animounos a aficcionarnos a unha actividade onde o respecto á natureza, a oportunidade de visitar lugares máxicos conxúganse co afán de experimentar.

Que mellor que rematar a charla facendo unha experiencia no salón de actos, coas luces apagadas e creando focos de luz coas pantallas dos nosos móbiles.

O resultado, espectacular

Biblioteca territorio das Artes: A fotografía e a luz

O vindeiro mércores na biblioteca teremos ocasión de falar sobre a arte da fotografía, a súa técnica e como xogar coa luz para conseguir abraiantes imaxes do ceo nocturno. Que mellor que aproveitar a experiencia dun dos nosos alumnos do CS de Mantemento de Instalacións Térmicas que lles falará aos seus compañeiros de Bacharelato e Ciclos de Marítimo Pesquera sobre a mellor época do ano para fotografiar a vía láctea, o equipo necesario e o procesamento técnico para lograr a máis impactante imaxe.

Día da Ciencia en Galego con Xurxo Mariño

O alumnado de Bacharelato do centro participou na actividade organizada pola Coordinadora Galega de ENDL con motivo do VI Día da Ciencia en Galego e tivo ocasión de escoitar por videoconferencia a charla de Xurxo Mariño, "A máquina que constrúe a mente e a realidade".

Colaboraron na actividade o departamento de Bioloxía, o departamento de Física e Química e o ENDL do centro. Unha nova oportunidade para falar de ciencia e reivindicar a posibilidade de facelo en galego.

Se queredes saber mais sobre Xurxo Mariño, aquí tedes unhas notas biográficas e unha ligazóns de interese, elaboradas polo profesor Manuel Cid, Xefe do Departamento de Física e Química.

Hoxe celebramos o día da Muller traballadora

Tal como tiñamos previsto, hoxe tivemos ocasión de escoitar a Rosa de la Campa, profesora da ETS de Náutica e Máquinas da Universidade da Coruña, falando da inserción laboral da muller en ámbitos moi masculinizados, particularmente no sector do mar.

En colaboración co departamento de FOL citamos ao alumnado de Marítimo-Pesqueira, pero tamén a unha representación do de Enerxía e Auga, Instalación e Mantemento, Electricidade, Animación Deportiva e Riscos Laborais. Procuramos que acudiran os grupos onde atopamos rapazas rodeadas de moitos compañeiros varóns (unha situación cotiá no noso centro, onde a presencia feminina é residual).

Tivemos ocasión de reflexionar sobre as estatísticas que reflexan que pese a ser maioritaria a presencia de alumnas nas aulas de Dereito o de Económicas, o dato non se corresponde ca porcentaxe de mulleres que ocupan funcións directivas nas empresas do IBEX35 ou nas Salas dos Tribunais Supremo ou Constitucional. Inclusive en sectores feminizados como ensinanza ou sanitario, non se atopan porcentaxes significativos de mulleres ocupando postos directivos no ensino ou no sector hospitalario.

Para dulcificar un pouco a dureza dos datos, quixemos rematar o acto recuperando a tradición rusa de agasallar con chocolate neste día, para recordar o papel que as mulleres xogaron en momentos dramáticos da historia recente, cando se viron obrigadas a asumir o rol de levantar a economía ante a falta de homes por mor das guerras.

As mulleres relevantes que estes días visitan a biblioteca tamén estiveron con nós na Sala de Reunións, e recordaron ca súa presencia o papel que a muller debe xogar en todos os ámbitos.

Aquí tedes unhas imaxes

Preparando a celebración do Día da Muller Traballadora

Na calendario da biblioteca queremos remarcar a data do 8 de marzo dun xeito especial. Pensamos que hai moito por facer para reivindicar os dereitos da muller, para facelas visibles.

Por eso estamos organizando unha serie de actividades e exposicións.

Estes días os andeis da biblioteca énchense de grandes mulleres, que traballaron en todos os ámbitos.

Se premes na imaxe poderás comprobar as desigualdades aínda vixentes e coñecer os dereitos e prohibicións existentes na data do teu nacemento e comparalos cos doutras décadas

Nun centro como o noso, onde o alumnado de Ciclos Formativos é maioritariamente masculino e preciso reflexionar sobre as dificultades que as mulleres atopan para traballar en entornos tradicionalmente masculinos (a electricidade, o frío industrial, o marítimo-pesqueiro...). Por iso, convidamos a Rosa Mª de la Campa, profesora na Universidade de A Coruña, na ETS de Naútica e Máquinas para que nos fale do traballo da muller no mar. Será o xoves, día 5, as 11:20, na Sala de Reunións.

Coordinamos esta actividade xunto co Departamento de FOL, por ser un contido propio deste módulo nos ciclos formativos, e co Departamento de Filosofía, para o alumnado de Bacharelato.

Tamén temos a nosa escaleira expositora chea de mulleres

Toda a información

Xeografía: Ciencias Sociais ou Ciencias da Terra?

De novo abrimos a nosa biblioteca para escoitar unha ponencia moi interesante, a cargo de José Antonio Aldrey, sobre o auténtico enfoque que ten o Grao en Xeografía e Ordenación do Territorio. Tradicionalmente a xeografía témola asociado as Ciencias Sociais, pero a exposición fíxonos ver as relacións que esta disciplina ten ca xeoloxía, a bioloxía e as ciencias da terra e medioambientais.

 

Falando de bacterias na biblioteca

Continuamos cas charlas na biblioteca. 

O martes acompañounos a Dra. Ana Otero Casal, para impartir a conferencia "Cómo se comunican as bacterias" dentro do programa "A ponte" da USC.

Explicounos que as bacterias, como outros microorganismos, teñen a facultade de comunicarse entre si para establecer estratexias de ataque infectivo sobre os seus húespedes. Falou dunha liña de investigación que trata de anular ou interferir na devandita comunicación. Entre os potenciais beneficios desta investigación estaría a posibilidade de loitar contra as infeccións dos chamados "super bugs" (bacterias resistentes aos antibióticos), tratamentos en plantas de acuicultura, evitando a administración de antibióticos nas especies destinadas ao consumo humano... 

Cociñando estatística na biblioteca

O pasado luns, día12, recibimos a Rosa M. Crujeiras Casais da facultade de matemáticas de Santiago de Compostela que impartiu una charla co título "Curso de Cociña Estatística: receitas sinxelas noveis".
Cos datos como ingredientes, aprendimos a cociñar algúns métodos estatísticos que nos permiten entender mellor a contorna que nos rodea. Apoiándose en exemplos de datos reais (do municipio de Culleredo, de Galicia e de paraxes remotas) presentaronse distintas ferramentas para describir datos e facer predicións (aprendimos a predicir o futuro!).  Ao longo da charla, incidiuse na importancia da Estatística e na interpretación dos resultados estatísticos.