Renovamos os nosos fondos en lingua galega

 Levávamos tempo querendo ver crecer os nosos fondos con novidades en galego. Aquí están, por fin!

No noso blog de Lecturas na Laboral tes máis información sobre cada obra.

O noso Lerflix ten unha programación especial polo Día das Letras

 Lerflix tínguese de galego polo 17 de maio.

 

Todos os títulos están dispoñibles na biblioteca. Aproveitade!

Feliz Día das Letras Galegas! Celebrao lendo!

Recordo a Domingo Villar do noso Club de Lectura

 Desta volta quixemos render homenaxe a Domingo Villar, cunha das súas últimas obras publicadas, Algúns contos completos. Pensamos que esta pequena xoia resume moi ben a contribución á nosa literatura deste autor.

Trátase dunha obra sen artificios nin complicacións, uns pequenos contos de andar pola casa, de gozar cos amigos, de rirse xuntos e desto vai tamén un club de lectura.

Aproveitamos para encher a mesa doutras propostas de lecturas en galego, contos mariñeiros, mitos e lendas, premios nacionais de narrativa, novela negra, clásicos da nosa literatura... centos de propostas na nosa lingua.

Para preparar a sesión elaboramos unha pequena guía de lectura, situando no mapa cada un dos contos.

Logo etiquetamos as temáticas de cada conto.

E por último, recollemos algúns fragmentos significativos de algúns deles.

Tamén atopamos nas redes algúns vídeos de Domingo Villar narrando algún dos contos. Resulta emocionante escoitalo.

Algunhas imaxes da sesión:

 

Aínda que nesta sesión houbo menos asistentes que noutras ocasións (o curso vai pesando) seguimos sumando tamén novas incorporacións. Non se pode pedir máis.

Día das Letras Galegas 2020: #DesconfinarALingua

Moitos membros da nosa comunidade educativa sumáronse á compaña das Bibliotecas Municipais de A Coruña, substituíndo as máscaras por recomendacións lectoras na nosa lingua.

Aquí tedes o resultado:

Sumámonos á campaña das Bibliotecas Municipais de A Coruña #DesconfinarALingua

Chegou a ansiada desescalada e parece o momento propicio para sustituir as máscaras quirúrxicas por obras escritas na nosa lingua, poesía, novelas, ensaio... É hora de sacar a lingua dos recintos onde permanece confinada, coma un rito, e que ocupe terrazas e rúas.

Queremos que a nosa comunidade educativa participe na campaña das Bibliotecas Municipais de A Coruña #DesconfinarALingua. Compartimos íntegramente a súa xustificación e reproducimos o texto da presentación da mesma.

"Nesta nova normalidade hai unha ferramenta humilde e simple que nos acompaña: as máscaras. Que cobren a nosa faciana hoxe para abrir horizontes abertos mañá. Tamén así os libros, a música, o pensamento, a palabra oral e escrita, nos achegan mundos, propostas, escenarios, realidades que amplían as nosas propias vidas.

 Este 17 de maio, Día das Letras Galegas tapamos a boca coas máscaras diversas da creación en galego xustamente para desconfinar a lingua, para abrir, cara nós e cara as demais, a xanela grande de todo o que ofrece o idioma. 

• Desconfinar a lingua é descubrir toda a creación que se pode desfrutar en galego.
• Desconfinar a lingua é, con Carvalho Calero, aproveitarmos o vínculo directo de galego e portugués para sentir un mundo de contidos e posibilidades.
• Desconfinar a lingua é ir máis alá do coñecido e poñer o foco na creación máis viva e contemporánea.
• Desconfinar a lingua é coñecela, poder usala, vivila con normalidade e sen filtros, en todos os ámbitos e situacións.
• Desconfinar a lingua é mostrar a nosa cara este 17 de maio nas redes, con libros, discos, publicacións, filmes... na nosa lingua, como xeito de os mostrar, recomendar e dar a coñecer.

 Unha ocasión  para coñecer, usar e vivir a lingua con normalidade e sen filtros en todos os ámbitos e situacións."

Entrega de premios aos gañadores do Concurso Galifoto

Aquí tedes aos gañadores do concurso de fotografía promovido polo Equipo de Dinamización de Lingua Galega. Recibiron o seu diploma de mans de membros do EDLG, do departamento de Lingua Galega e do equipo da biblioteca.

Aldaolado sembran versos e sonrisos na biblioteca

Hoxe na biblioteca celebramos por todo o alto o Día do Libro, e fixémolo ao grande coa visita de Lucía Aldao e María Lado.

Xa que este ano a temática proposta para as bibliotecas escolares é Poéticas Diversas pensamos en darlle unha volta ao concepto de poesía, en romper prexuízos e promover un recital poético non ao uso, no que impera a risa, a improvisación e a complicidade.

Alumnado de 1º de BAC e do Ciclo Superior de Mantemento de Instalacións Térmicas e Fluídos, xunto con moitos representantes do profesorado, gozamos da oportunidade de compartir os versos e o humor de Aldaolado.

Primeiro, tocaron as presentacións...


 Uns versos para comezar...


Sempre hai tempo para reivindicar o idioma e practicar sobre o uso do pronome átono, coa axuda das cancións de Rocío Jurado.




Pero tamén tivemos que facer de poetas improvisados


O resultado encantounos, quedounos un poema magnífico, único e inesquecible.

Sempre en galego, e con máis razón no mes das nosas Letras

Este mes de maio enchemos a nosa mesa de propostas lectoras en galego. Temos banda deseñada, novela xuvenil, poesía, ciencia... Ti só tes que elexir unha, ou dúas... ou cantas queiras

Día das Letras Galegas e Carlos Casares

Como sabedes, hoxe celebramos o día das nosas letras, cunha homenaxe a Carlos Casares.

Na nosa escada expositora atoparedes algunha das súas obras

Se queredes coñecer máis sobre a súa biografía e a súa producción literaria e periodística, premede na imaxe

O Club de Lectura comenta "Os nenos da varíola"

Esta semana das Letras Galegas o noso Club de Lectura reuniuse para falar da novela de Maria Solar "Os nenos da varíola".

Todos coincidimos en que é unha obra moi amena, de lectura doada para todas as idades. O mellor, sen dúbida, todos os temas que foron saíndo grazas a esta lectura: os avances científicos, a reivindicación do papel de mulleres valentes como Isabel Zendal, o descubrimento de episodios históricos esquecidos inxustamente, reivindicarnos como coruñeses protagonistas da historia... Coma en cada sesión, o club e a conversa levounos a falar de outros libros, de música, de películas, de viaxes... Unha auténtica ledicia.

Para rematar o curso e as sesións do Club propuxemos unha lectura corta pero intensa, que pensamos que nos vai levar a unha intensísima conversa.

O autor e a obra prometen...

Fala bonito, fala galego!!

O EDLG ven de propoñernos participar na súa campaña "Fala bonito, Fala galego".

Trátase de escoller a palabra que máis vos guste en galego. Na biblioteca tedes carteis con algunhas das palabras máis fermosas no noso idioma.

Moitos dos profesores e persoal non docente xa partiparon para anirmarvos

Entre todos os alumnos que participen coa súa foto sortearase unha tarxeta/agasallo da FNAC. Recorda compartir a túa foto coa etiqueta #ULfalabonito en calquera rede

Suso Lista enche a nosa biblioteca de historias

Hoxe recibimos na Laboral a visita de Suso Lista. Na biblioteca esperábano os alumnos dos Ciclos de Marítimo Pesqueira e algúns dos de Bacharelato.

 

A desculpa eran os seus libros de relatos "Salseiros" e "Xeixos", que falan do mar, da vida dunha vila coma Corme, pero que podería ter sido calquera outra de Galicia.

Aquí queda unha mostra dos seus relatos e de coma tiña envelesados aos asistentes

<

Pero o mellor foron as súas recomendacións animando á lectura,  a descubrir nos libros outros horizontes. Compartiu con nós a súa propia experiencia coma mariñeiro e da vida no barco, onde os libros foron a vía de escape para os longos días no mar. Falounos da emoción e orgullo de ter sido un alumno da Laboral e hoxe sentarse da outra banda, para impartir leccións como autor dos seus relatos. 

Non se cansou de insistir aos rapaces que foran cidadáns críticos, que non aceptaran o que publican sen máis os medios, que contrastaran, que buscaran a verdade e que se comprometeran. Aproveitou para recordar outros tempos máis reivindicativos e traernos á memoria a loita da Laboral no conflicto das Encrobas, do que se cumpren agora cuarenta anos.

Neste video queda recollido parte do seu relato

Agradecemos moitísimo a Suso que viñera e non puidemos menos que agasallalo coa litografía que fixemos con motivo do noso cincuenta aniversario.

Por suposto, tamén houbo tempo para reivindicar a nosa lingua, e Suso rematou participando na actividade organizada polo EDLG do centro.

Nos exemplares das súas obras quedounos a súa sinatura, coma recordo do día

Suso Lista visitará a nosa biblioteca o vindeiro día 21

Xa estamos preparando a visita de Suso Lista e desexando escoitar as súas historias co sabor do mar do Roncudo.

O polifacético autor (tamén percebeiro, actor, locutor, guionista...) falará dos seus libros "Salseiros" e "Xeixos", pero a cousa promete non quedar aí. Seguro que tamén hai tempo para recordar algunha aventura dos tempos nos que foi alumno da Laboral.

Mes das Letras con Manuel María

Manuel María acompáñanos coa súa obra nos andeis da biblioteca e os corredores do centro, xunto con outros autores galegos homenaxeados en anos anteriores.