Visita o noso blogue de Lecturas recomendadas

Se queres ir preparando as túas lecturas para o verán, pásate polo blogue de Lecturas na laboral. Alí atoparás moitas recomendacións. Preme na imaxe e busca os fondos do teu interese.

O alumnado participante nas Xornadas de Convivencia do Voluntariado de Lectura explora a nosa biblioteca

O pasado xoves, 26 maio, tivemos unha visita moi especial: cincuenta alumnos dos centros CEIP Ricardo Tobío (Muros, A Coruña), CEIP Ramón Falcón (Castro de Rei, Lugo), CEIP de Leirado (Salvaterra de Miño, Pontevedra) e CEIP Sobreira-Valadares (Vigo, Pontevedra) viñeron a coñecer a nosa biblioteca e participaron nun obradoiro que lles permitiu explorar os nosos fondos e demostrar que poden desenvolverse perfectamente nunha biblioteca pensada para un perfil de usuarios moi diferente.

Para nós foi moi gratificante velos desfrutar recorrendo os andeis e comprobar que a nosa biblioteca pode ser un lugar axeitado para moi distintos usuarios. Encantounos compartir esa tarde con eles!! Aprendemos moito todos!!

Sabías que no instituto temos unha colección de vinilos?

Estes días estivemos a rescatar algúns tesoiros da antiga biblioteca.

Xa estamos a piques de rematar a recatalogación de moitos vinilos que permaneceron agochados durante anos na antiga biblioteca.

Temos un pouco de todo

Mes das Letras con Manuel María

Manuel María acompáñanos coa súa obra nos andeis da biblioteca e os corredores do centro, xunto con outros autores galegos homenaxeados en anos anteriores.

O noso revisteiro en maio

Xa podes explorar a cociña cósmica con Jordi Cruz, descubrir o poder do humor, rir coas últimas viñetas de "El Jueves", ou desfrutar de "Rock de Lux".

Pásate polo noso revisteiro

Andrea Maceiras visita o IES Universidade Laboral

Onte tivemos a sorte de ter a oportunidade de comentar en directo con Andrea Maceiras a súa obra "Nubes de evolución". Todo o alumnado de 1º de Bacharelato, acompañado dos profesores do Departamento de Lingua Galega, puido coñecer o proceso de creación da obra, o deseño das personaxes e a elaboración da trama argumental. Houbo ocasión tamén para falar de cine, literatura, os estudos de Filoloxía...unha charla amena e enriquecedora.

A continuación, Andrea Maceiras visitou a biblioteca do centro, onde firmou exemplares das súas obras e tamén respondeu a novas preguntas

Deixounos tamén a súa dedicatoria nos exemplares da biblioteca

Grazas a Andrea e a editorial Xerais que fixo posible este encontro.

Xa estamos esperando que volva para falarnos da súa nova obra "Europa Express". Na biblioteca xa temos tres exemplares dispoñibles!!

Os libros son para valentes e.... solidarios

O luns 25, co gallo do Día do Libro Solidario, tivemos ocasión de combinar libros e solidariedade.

 

A cambio dun dos libros expurgados da antiga biblioteca pediamos un litro de leite.

O resultado: dunha banda, tivemos o posto cheo co persoal do centro, profesores e alumnos escollendo a súa próxima lectura...

.... E o mais importante: recollemos mais de 400 litros de leite para o Banco de Alimentos Rías Altas.

Unha celebración do Día do Libro moi gratificante. Ata onde chega o poder dos libros!!

 Queda claro que os libros son para os valentes, como di Pedro Feijoo no seu texto; pero nós engadimos: e para os solidarios!!