Chegou o Samaín. Lecturas de medo

 

A nosa biblioteca está chea de arrepiantes lecturas, non teñas medo e ven!

 

Semana das Bibliotecas: Os nomes íntimos, de Lucía Aldao e Samuel Merino.

 Como un día parécenos pouco, teremos toda unha semana de celebración. O evento estrela da semana será gozar do recital poético-musical de Lucía Aldao e Samuel Merino. A proposta mestura a palabra, a poesía, a música e a interacción co público por medio de propostas lúdicas.

Tecido coa infinita capacidade da poesía en lingua galega para aguzar o sentido crítico e ofrecer unha ollada artística e poliédrica sobre asuntos como a igualdade, a diversidade sexual, a construción da identidade ou a saúde (mental, pero non só) este recital musicado xorde da necesidade de celebrármonos na nosa individualidade, pero tamén da de sabernos parte dun todo (colectivo, comunidade, sociedade, panda de amigas) no que atopar referencias e referentes desde e coas que ir conformando esa persoa que somos ou estamos a piques de ser e coa que conviviremos o resto das nosas vidas. Esa persoa que leva tantos nomes aos que atendemos cando nos chaman.

A loita contra as Fake News desde a nosa biblioteca. Contra a desinformación, bibliotecas!

 A situación actual de desinformación, bulos, noticias falsas é alarmante, pero hoxe no Día das Bibliotecas queremos poñer unha nota de humor. Pensamos que a labor dos centros docentes, en xeral, e das bibliotecas, en particular, acabará por dar o seus froitos e gañar a batalla.

 

A mellor cousa que podemos facer no día de hoxe é presentar unha selección de lecturas que nos axudarán a interpretar o mundo.
 

Xa sabedes, contra a desinformación, BIBLIOTECAS!

Día das Bibliotecas: Contra a desinformación

 Nestes momentos semellan máis necesarias que nunca as bibliotecas. Resultan imprescindibles fontes fiables de información frente a ameaza de influencers, Tik-Tok e Fake News.

 Este venres, 24 de outubro, celebramos o Día das Bibliotecas, unha data crave para poñer en valor a función esencial que estes espazos desempeñan na nosa sociedade. 

Unha orixe con memoria: ​por que o 24 de outubro?

 Esta celebración, impulsada pola Dirección Xeral do Libro, do Cómic e da Lectura do Ministerio de Cultura, conmemora o tráxico incendio da Biblioteca de Saraievo en 1992, durante o conflito dos Balcáns. É unha homenaxe ao labor dos bibliotecarios e un recordatorio da importancia da defensa da cultura, a memoria e o acceso libre ao coñecemento. ​ Desde 2019, a celebración incorpora o lema xeral "Aptas para todos os públicos", ao que se suma un fío condutor temático que cambia cada ano. 

 O desafío de 2025: "contra a desinformación" 

 

 

 

 Nesta edición, o foco ponse nun desafío crucial do noso tempo: a loita contra a desinformación. Baixo o lema "Contra a desinformación: bibliotecas", destácase o rol de todas as tipoloxías de bibliotecas (públicas, escolares, universitarias, especializadas e nacionais) como diques de contención fronte ás fake news.

As bibliotecas non só combaten a desinformación a través das súas coleccións e bases de datos, senón, e sobre todo, grazas ao labor do seu persoal bibliotecario, que actúa como curador de contidos, ofrecendo apoio aos usuarios e ensinando a discernir fontes fiables e contrastadas.

A mirada de Laura Wächter: imaxe e mensaxe

Para dar imaxe a esta xornada, o Ministerio de Cultura contou co talento da ilustradora Laura Wächter. A súa capacidade para transformar conceptos complexos en imaxes claras e suxestivas convértea na elección ideal. A súa obra, que xoga coa contraposición entre o suave e o áspero, reflicte, sen dúbida, a capacidade da biblioteca para ofrecer luz e claridade nunha contorna de ruído informativo, reforzando a idea do acceso ao coñecemento como ferramenta de empoderamento.

A nosa axenda de outubro

 

Xa todo en orde, co equipo traballando para comezar a encher o noso calendario de actividades.

En outubro, exposición de Mulleres Escritoras, celebración do Día das Bibliotecas, comezo do Club de Lectura e a visita de Lucía Aldao e Samuel Merino co seu espectáculo os Nomes Íntimos.

Por suposto, non nos esquecemos das lecturas de medo polo Samaín. 

 

Únete ao noso Club de Lectura

 

Un ano máis o club de lectura busca xente que queira compartir con nós conversas e actividades sobre os diferentes libros escollidos, que abranguen temáticas e xéneros diversos. Só tedes que poñer a vontade de ler e nós poñemos os libros, lambetadas e café. 

A biblioteca no teu peto!

 Xa non tes excusa! A biblioteca está sempre aberta no teu móbil.

Agora podes escanear o QR e acceder ao noso catálogo nun click.

 

 

 Hora de buscar ese libro que necesitas" Fai a proba!