Mulleres a Contracorrente: As Mulleres das Encrobas, unha loita colectiva

O conflito das Encrobas, hoxe esquecido da memoria colectiva, resúmese nunha imaxe icónica: labregas á fronte, defendendo as súas terras ante axentes da garda civil, vestidos con tricornio e capa. Os veciños, coas mulleres por diante, enfrontáronse co que tiñan -sachos, paus, galletas ou paraugas-. Houbo agresións, desmaios, carreiras, berros, tensión...e as fotografías tiradas por Xosé Castro, fotógrafo de La Voz de Galicia, fixeron que o conflito ocupase portadas e programas de televisión. A sociedade solidarizouse coa causa e os encerros e manifestacións de apoio foron numerosas. Precisamente a única vítima mortal do conflito foi Emilio Suárez, un estudante da Universidade Laboral que morreu electrocutado cando colocaba unha pancarta no tellado do instituto. Bateu cun cable de alta tensión, propiedade, precisamente, de Fenosa